Sa isang pamantasang sumasagisag sa pagkandili ng puti, sa pagsinta ng mas malilim na kulay ng pula, kumakalatwat ang isang tinig—patag, monotono, at tila ‘di-buong ritmo. Ano ang dapat upang itong tinig ay hindi manatiling tinig kundi tuluyang maging himig?

𝘋𝘪𝘯𝘢𝘮𝘪𝘬𝘢.

Ang ika-4 ng Oktubre ay kinulayan ng isang pagdiriwang na nagbibigay-pugay sa mga humuhubog ng isipan at kumakalinga sa mga puso kung saan nakaukit ang karunungan—ang mga guro sa bayan ng Candelaria.

“Kung monotonous na ‘yung trabaho ng teachers, Monday to Friday trabaho, at least ngayong araw, nabigyan sila ng pahinga,” pahayag ni G. Jonathan Villaruz, punong-guro ng sekondarya.

Diwa ng pagkakaisa ang siyang binuhay sa pangunguna ng Candelaria Quezon People Council (CQPC) na binigyang suporta nina Dra. Helen Tan, Dr. Kim Tan, Hon. Ogie Suayan, at mga miyembro ng Candelaria West Teachers Association (CANDWESTA), Candelaria East District School Personnel Association (CEDSPA), at Candelaria Private Schools Association (CAPRISA).

Ang sikhay at sikap ng mga guro, nakakubli man o hindi, ay kinilala sa pamamagitan ng iba’t ibang pagpapahayag: harana, tula, sayaw at dula ng iba’t ibang pinuno ng paaralan, pagrampa sa entablado ng mga respetadong guro, at paggawad sa kanilang katangi-tanging kahusayan.

𝘗𝘢𝘶𝘭𝘪𝘵-𝘶𝘭𝘪𝘵…

𝘐𝘪𝘴𝘢…

𝘞𝘢𝘭𝘢 𝘣𝘢𝘯𝘨 𝘪𝘣𝘢?

Hindi napapaligiran ng mga salitang ito ang tunay na depinisyon ng pamamahalang may nakawiwiling harmoniya. Dinamika, saya, pahinga—piyesa upang ang isang tinig ay siya nang maging himig.

 

ulat ni Mica Umandap | Ang Siklab

mga litratong kuha nina Biatriz Soriano, Sophia Tacob, Mica Umandap, at Kairo Galarce | Ang Siklab